نەخشەسازیی نوێ بۆ بینای قوتابخانەکانی هەرێمی کوردستان دەکرێت
وەزارەتی پەروەردەی حکومەتی هەرێمی کوردستان ڕایگەیاند: “نەخشەسازیی نوێ بۆ بینای قوتابخانە و ناوەندەکانی خوێندن دەکرێت”.
ئەمڕۆ یەکشەممە (١ ی ئەیلوولی ٢٠٢٤)، ئالان حەمەسەعید، وەزیری پەروەردەی حکومەتی هەرێمی کوردستان، لە کۆنگرەیەکی ڕۆژنامەوانیدا ڕایگەیاند: “بە نەخشەی بیناسازیی ناوەندەکانی خوێندندا دەچینەوە و ئەوەش قوتابخانە ١٢ و ١٨ پۆلییەکان دەگرێتەوە”.
وەزیری پەروەردە گوتیشی: “لەمەودوا هەموو ئەو ناوەندانەی خوێندن، بە دیزانێکی نوێ دروست دەکرێن، کە سێتێکی تەواوی بیناسازی ئامادە کراوە و بە وردی لێی کۆڵراوەتەوە و لایەنە جیاوازەکانی لەبەرچاو گیراوە. هاوکات هەر وەبەرهێن و لایەنێکی کەرتی تایبەت دەتوانن سوود لەو نەخشەسازییە ببینن کە ئامادەمان کردووە”.
ئالان حەمەسەعید ئاماژەی بەوە دا، “وەزارەتی پەروەردە هەنگاوی گرنگی لە کەرتی پەروەردە ناوە، وەکوو دامەزراندنی ٢٨ هەزار مامۆستای وانەبێژ، ٥ هەزار و ٨٨ مامۆستا لە گرێبەستەوە کراونەتە هەمیشەیی؛ هەروەها لەم کابینەیەدا وەرچەرخانێکی گرنگ لە بواری بەدیجیتاڵیکردنی کەرتی پەروەردە کراوە؛ ئەمە کارگێڕیی پەروەردەشی گرتووەتەوە، جگە لە بەرنامەی خوێندن و بڕوانامەکان”.
حکومەتی هەرێمی کوردستان لە سەردەمی کابینەی نۆیەمدا، گرنگی داوە بە ڕاهێنانی مامۆستایان، هەڵسەنگاندنی مامۆستا و بەڕێوەبەران، گرنگیدان بە منداڵانی خاوەنپێداویستیی تایبەت، خوێندنی ٦٠ هەزار قوتابیی پەنابەر، هاوکات ڕێژەی نەخوێندەواری ٨٪ کەم کردووەتەوە.
فەرمانگەی میدیا و زانیاری
