شاندی حکومەتی هەرێم و حکومەتی فیدڕاڵ لەسەر چەند خاڵێک لە بواری باج ڕێک کەوتن
![](https://usercontent.one/wp/www.krgaustralia.net/wp-content/uploads/2024/07/localimages/img-20240718-wa0011-1.jpg?media=1678916050?anchor=center&mode=crop&width=1200&height=630&rnd=133658018460000000)
دوای سەردانی لیژنەی باڵای ڕێکخستنەوەی باج لە حکومەتی فیدراڵی بۆ هەرێمی کوردستان و کۆبوونەوەیان لەگەڵ وەزیری دارایی و دکتۆر کەمال تەیب، بەڕێوەبەری گشتیی باج و خانووبەرەی میری و بەختیار حاجی، بەڕێوەبەری گشتیی کاروباری پەیوەندییەکان و بەدواداچوون لە نوێنەرایەتیی حکومەتی هەرێم لە بەغداد، لەسەر چەند خاڵێک لە بواری باج گەیشتنە ڕێککەوتن، کە دەبێتە کارئاسانی بۆ ئەو کارگە و کۆمپانیا و بانکانەی لە هەرێمی کوردستان و عێراق کار دەکەن؛ لە گرنگترینیان:
١- داننان بە پاکانەی باجی هەرێم لەلایەن حکومەتی فیدراڵییەوە کە پێشتر هیچ بایەخێکیان بۆ دانەدەنا.
٢- چارەسەرکردنی کێشەی کارگەکانی کوردستان، کە پێشتر داوای باجیان لێ دەکردن، بە بیانووی ئەوەی بەرهەمەکانیان لە ناوچەکانی باشوور و ناوەڕاستی عێراق ساغ دەکەنەوە، بۆ لەمەودوا ئەو کارگانەی لە کوردستانن، دەبێت باجی داهاتەکانیشیان لەکوردستان بدەن.
٣- چارەسەرکردنی کێشەی پێدانی سووتەمەنی بۆ کارگەکانی هەرێمی کوردستان بە نرخی هاندراو کە ماوەیەکە پێدانی سووتەمەنیان بەو کارگانە ڕاگرتووە، بە بیانووی نەدانی باج بە حکومەتی فیدراڵی.
٤- ڕێکەوتن لەسەر یەکخستنی ڕێکار و ڕێوشوێنەکانی وەرگرتنی باج کرا بە میکانیزمی هاوبەش.
٥- هەردوولا لەسەر بانکەکان ڕێک کەوتن کە بارەگای سەرەکیی بانکەکە بکرێتە بنەما بۆ وەرگرتنی باج.
٦- هەردوولا ڕێک کەوتن لەسەر هەماهەنگیی پێویست و گرتنەبەری ڕێوشوێنی گونجاو بۆ ڕێگریکردن لە خۆدزینەوە لەباج.
فەرمانگەی میدیا و زانیاری