سەرۆکی حکومەتی هەرێمی کوردستان پێشوازی لە شاندێکی ئەمەریکی دەکات
![](https://usercontent.one/wp/www.krgaustralia.net/wp-content/uploads/2024/07/localimages/photo_4_2024-07-11_16-32-45.jpg?media=1678916050?anchor=center&mode=crop&width=1200&height=630&rnd=133651783720000000)
ئەمڕۆ پێنجشەممە 7/11 مەسرور بارزانی سەرۆکی حکومەتی کوردستان ، پێشوازی لە شاندێکی ئەمەریکی کرد بە سەرۆکایەتی دانیێل شاپیرۆ جێگری یاریدەدەری وەزیری بەرگری بۆ کاروباری ڕۆژهەڵاتی ناوەڕاست.
لە کۆبوونەوەکەدا کە ئەلینا ڕۆمەناوسکی باڵیۆزی ئەمەریکا لە عێراق و جەنەراڵ جۆل ڤاوڵ، فەرماندەی گشتیی هێزەکانی هاوپەیمانان لە عێراق و سوریا و نیکۆل سۆفتنێس بەڕێوەبەری کاروباری عێراق و سوریا لە ئەنجومەنی ئاسایشی نیشتمانی ئەمەریکا ئامادەی بوون، گفتوگۆ لەبارەی دوایین گۆڕانکاریی و پێشهاتەکانی عێراق و ناوچەکە کرا.
جێگری یاریدەدەری وەزیری بەرگری ئەمەریکا ، پشتیوانیی وڵاتەکەی بۆ هەرێمی کوردستان و هێزی پێشمەرگە دووپات کردەوە و ئاماژەی بەوە دا کە هەرێمی کوردستان هاوبەشێکی گرنگ و ستراتیژی ئەمەریکایە و خواستی وڵاتەکەشی بۆ پەرەپێدانی زیاتری هاریکاری و هەماهەنگیی ئەمنی و سەربازی لەگەڵ حکومەتی هەرێمی کوردستان دەربڕی .
تەوەرێکی سەرەکی کۆبوونەوەکە ، تاوتوێکردنی پێشکەوتنەکانی تایبەت بە چاکسازییەکانی وەزارەتی پێشمەرگە بوو، لەمبارەیەوە ،جێگری یاریدەدەری وەزیری بەرگری ئەمەریکا ، سوپاسی هەوڵ و کارکردنی بەردەوامیی سەرۆکی حکومەتی کرد بە ئاراستەی سەرخستنی چاکسازییەکان و یەکخستنی هێزی پێشمەرگە و ئاماژەی بەوەدا کە ئەمەریکا و هاوپەیمانیی نێودەوڵەتیی، بەردەوام دەبن لە پشتیوانیکردنی هێزی پێشمەرگە بۆ ڕووبەڕووبوونەوەی هەڕەشەکانی تیرۆر و بە تایبەتی تیرۆریستانی داعش.
سەرۆکی حکومەت، سوپاس و پێزانینی هەرێمی کوردستانی بۆ پشتیوانیی بەردەوامیی ئەمەریکا نیشاندا و جەختی لە پتەوکردنی پەیوەندیی دوولایەنە لە بوارە جۆراوجۆرەکاندا کردەوە.