سایلۆی قوشتەپە بە گوژمەی ٢١ ملیار و ٢٧٦ ملیۆن دینار دروست کرا
![](https://usercontent.one/wp/www.krgaustralia.net/wp-content/uploads/2024/06/localimages/whatsapp-image-2024-06-29-at-163221_f2af6fd9.jpg?media=1678916050?anchor=center&mode=crop&width=1200&height=630&rnd=133641416090000000)
سایلۆی قوشتەپە یەکێکە لە سایلۆ نوێیەکان، کە بە گوژمەی ٢١ ملیار و ٢٧٦ ملیۆن دینار دروست کرا؛ توانای عەمبارکردنی ٤٠ هەزار تۆن گەنمی هەیە. لەمساڵدا سایلۆکە گەنمی جوتیارانی (شەمامک، سێگردکان، بالیسان) وەردەگرێت و بە باشترین و نوێترین شێواز بنیاد نراوە.
ئیسماعیل ئەحمەد، بەڕێوەبەری سایلۆی قوشتەپە لەم بارەیەوە دەڵێت: “ئەم سایلۆیە توانای بەکۆگاکردنی ٤٠ هەزار تۆن گەنمی هەیە؛ لە ١١ بەش پێک دێت و ١٦ کۆگای هەیە، هەر کۆگایەکیش توانای وەرگرتنی ٢ هەزار و ٥٠٠ تۆن گەنمی هەیە. هەروەها بە تەواوبوونی ئاسانکارییەکی زۆر بۆ جوتیاران کراوە و بە یەک ڕۆژ و بە کاتێکی کەمتر لە پێشتر گەنمەکانیان لێ وەردەگیرێت”
سایلۆی قوشتەپە لە ٢٠٢٤/٦/٢٥، لەلایەن مەسرور بارزانی، سەرۆکی حکومەتی هەرێمی کوردستان کرایەوە. بە دروستکردنی، بووەتە پشتگیرییەکی باش بۆ جوتیارانی ناوچەکە و کەمکردنەوەی فشار لەسەر سایلۆکانی تری هەولێر.
لە کابینەی نۆیەم سایلۆکانی کەلار، بەردەرەش و قوشتەپە دروست کران؛ کە توانای بەکۆگاکردنی ١٢٠ هەزار تۆن گەنمیان هەیە. سایلۆی هەڵەبجەش لە دروستکردندایە و لە ئاییندەدا دەچێتە خزمەت جوتیاران. کۆی تێچووی سایلۆکان گەیشتووەتە ٨٥ ملیار دینار.
حکومەتی هەرێمی کوردستان بەردەوامە لە خزمەتکردنی جوتیاران و بەهێزکردنی ژێرخانی ئابووری و دروستکردنی سایلۆی گەورە بۆ بەبازاڕکردنی گەنمی جوتیاران.
فەرمانگەی میدیا و زانیاری