وەزارەتی پەروەردە: سوپاسی ڕۆڵی دڵسۆزانەی مامۆستایان دەکەین
![](https://usercontent.one/wp/www.krgaustralia.net/wp-content/uploads/2023/10/localimages/untitled-wwww.jpg6521c8db627d3.jpg?center=0.49367088607594939%2C0.49367088607594939&media=1678916050&mode=crop&width=1200&height=630&rnd=133313978320000000)
ئەنجومەنی وەزارەتی پەروەردەی حکومەتی هەرێمی کوردستان ڕاگەیەنراوێکی لەبارەی دۆخی مامۆستایان و پڕۆسەی خوێندن بڵاو کردووەتەوە و دەڵێت: “مووچە مافێکی بنەڕەتیی مامۆستا و فەرمانبەرانە و ئێمە سوپاسی ڕۆڵی دڵسۆزانەی مامۆستایان دەکەین”.
لە ڕاگەیەنراوەکەدا هاتووە:” هەموولایەک دۆخی داراییی ئێستای هەرێمی کوردستان و هۆکارەکانی دروستبوونی ئەو دۆخە دەزانین کە ڕووبەڕووی هەرێمی کوردستان کراوەتەوە.”
ئەنجومەنی وەزارەتی پەروەردە دەڵێت: “زیاتر لە دوو هەفتەیە دەوامی ناوەندەکانی خوێندن دەستی پێ کردووەتەوە، لە هەندێک ناوچە دەوام نەکراوە و داواکارین هەرچی زووە دەست بە پرۆسەی پەروەردە و فێرکردن لەو ناوچانە بکرێتەوە، چونکە دەرئەنجامەکانی بایکۆت لە ساڵانی ڕابردوو زیانی هەبووە و هیچ بوارێکمان نییە گۆڕانکاری لە ساڵنامەی خوێندن بکرێت.”
ئەنجومەنی وەزارەتی پەروەردە دەشڵێت: “بۆ ئەم مەبەستە سەرجەم بەڕێوەبەرایەتیی گشتیی پەروەردە پەیوەندیدارەکان ئاگادار دەکەینەوە کە بە زووترین کات دەست بە دەوامی ناوەندەکانی خوێندن بکرێتەوە.”