سەرۆکی دیوانی ئەنجومەنی وەزیران لەگەڵ وەزیری کشتوکاڵ و سەرچاوەکانی ئاو کۆدەبێتەوە
![](https://usercontent.one/wp/www.krgaustralia.net/wp-content/uploads/2022/06/localimages/f0045a6e-8018-45c1-9cb5-68cffddb9ddb.jpeg62a24d7eeabec.jpeg?media=1678916050?anchor=center&mode=crop&width=1200&height=630&rnd=132992690970000000)
هەولێر، هەرێمی کوردستان، عێراق (GOV.KRD)- ڕۆژی پێنجشەممە ٩ـی حوزەیرانی ٢٠٢٢ ، د. ئومێد سەباح، سەرۆکی دیوانی ئەنجومەنی وەزیران، سەردانی وەزارەتی کشتوکاڵ و سەرچاوکانی ئاوی حکومەتی ھەرێمی کوردستانی کرد، لەلایەن خاتوو بێگەرد تاڵەبانی ، وەزیری کشتوکاڵ و سەرچاوەکانی ئاو ، و بریکاری وەزارەت و بەڕێوەبەرە گشتییەکان و ڕاوێژکارانی وەزارەتی ناوبراو پێشوازی لێکرا.
سەرەتا وەزیری کشتوکاڵ و سەرچاوەکانی ئاو، بەخێرھاتنی سەرۆکی دیوانی ئەنجومەنی وەزیران و شاندی یاوەری کرد و ئاماژەی بە پێداویستییەکانی وەزارەتی کشتوکاڵ و سەرچاوەکانی ئاو کرد.
ھەر لە کۆبوونەوەکەدا سەرۆکی دیوانی ئەنجومەنی وەزیران ، بەردەوامی پاڵپشتی و ھەماھەنگی سەرۆکایەتی دیوانی ئەنجومەنی وەزیران و وەزارەتی کشتوکاڵ و سەرچاوەکانی ئاوی بە پێویست زانی، بۆ ئەم مەبەستە تیشکی خستە سەر بەکارھێنانی دەسەڵاتەکانی وەزارەت و بەرێوەبەرە گشتییەکان بەپێی یاسا بەرکارەکان و لە پێناو نەھێشتنی ڕۆتین و خێراترکردنی مامەڵەی ھاوڵاتیان لە دام و دەزگاکانی حکومەتدا.
تەوەرێکی تری کۆبونەوەکە، سەرۆک دیوانی ئەنجومەنی وەزیران،تیشکی خستە سەر پرسی سەرچاوەکانی ئاو ، گرنگیدان بەو پرسەو تەحەدیاتەکانی بەردەم ئەو سەرچاوە گرنگە لە داھاتوودا و دۆزینەوەی چارەسەر بۆ ئەم پرسە ، دانانی پلان و ئامادەکردنی راپۆرت بۆ ئەم مەبەستە تاوتوێ کران، پرسی بەنداوەکان و جێبەجێکردن و بەدواداچوون لەبارەی کارەکانی دروستکردنی بەنداوەکان و سەرچاوەکانی ئاو ، ھەروەھا پرسی سامانی ئاژەڵ و ڤێتێرنەری و توێژینەوە و پاراستنی سروشت و ژینگەی کوردستان و پاڵپشتیکردنی جوتیاران و پڕکردنەوەی پێداویستییەکانیان بە گرنگ زانرا.
ڕاسپاردنی تیمێک بۆ پرسی ئاسایشی خۆراک، پرسی لێدانی بیری مۆدێرن و ئەنجامدانی ڕووپێوێکی گشتگیر بۆ پرسی کشتوکاڵ و سەرچاوەکانی ئاو لە کۆبونەوەکە جەختیان لێ کرایەوە ، سەرۆکی دیوان پالپشتی سەرۆکایەتی دیوانی ئەنجومەنی وەزیرانی بۆ پرسی بەنداوەکان دەربڕی، پرسی دارستانە دەستکردەکان و پاراستنیان لە لەناوچوون و بابەتی باخ و پاوان ، کردنەوەی خولی ڕێنمایی کشتوکاڵی تەوەرێکی تری کۆبوونەوکە بوون.