حكومەتی هەرێمی كوردستان دووەم دەروازەی نێودەوڵەتی لەگەڵ توركیا کردەوە
ئەمڕۆ چوارشەممە، ١٠ـی ئایاری ٢٠٢٣، بە شێوەیەکی فەرمی دەروازەی سنووریی نێودەوڵەتیی زێت کە دەکەوێتە ئیدارەی سۆران، لە نێوان هەرێمی کوردستان و تورکیا کرایەوە.
کارەکانی دەستپێکردنی کردنەوەی خاڵە سنوورییەکە بۆ ساڵی ٢٠٢١ دەگەڕێتەوە، کە جگە لە هاموشۆی گەشتیاری، بۆ بزاڤی بازرگانی پەرەی پێ دەدرێت و بەگەڕ دەخرێت.
هەڵگورد شێخ نەجیب، سەرپەرشتیاری ئیدارەی سەربەخۆی سۆران، بە فەرمانگەی میدیا و زانیاریی ڕاگەیاند: “كار بۆ ئەوە دەكرێت جوڵەی بازرگانی لە دەروازەکە بەگەڕ بخرێت”.
دەروازەکە ڕۆژانە لە کاتژمێر ٨ـی بەیانی تاکوو ٨ـی شەو کراوە دەبێت و پێشوازی لە هاووڵاتییان دەکات.
دەروازەی نێودەوڵەتیی زێت، دەكەوێتە سنووری ناحیەی شێروانمەزن، لە قەزای مێرگەسۆری سەر بە ئیدارەی سەربەخۆی سۆران و دەبێتە دەروازەیەکی نوێی نێودەوڵەتی لە نێوان هەرێمی کوردستان و تورکیا.
فەرمانگەی میدیا و زانیاری